डियर तुकोबा

तुकोबाच्या भेटी | झुकर्बर्ग गेला |
सोहळा तो झाला | तीरावर ||

झुक्या म्हणे तुका | बदलले नाव |
फेसबुक गाव | ‘मेटा’पूर ||

तुकाने पिळले | झुक्याचे ते कान |
घे म्हणे आण | विठोबाची ||

हबकला झुक्या | बावरला तोची |
झाली त्याची गोची | देहूगावी ||

लोकांचे मॅसेज | वाचतो चोरून |
प्रायव्हसी हेरून | नाठाळ तू ||

झुक्या म्हणे ना ना | आरोप असत्य |
सांगतो मी सत्य | विश्वासाने ||

तुकाने दिधला | सज्जड तो दम |
सांगितले ठाम | निक्षूनिया ||

तुवा फेसबुक | द्वेषाची ओवरी |
मनी क्लेष भरी | लोकांचिया ||

संवाद साधन | बनले घातक |
याचे हे पातक | तुझ्या माथी ||

होय होय तुका | झुक्या वरमला |
‘मेटा’कुटी आला | पायापाशी ||

तुकाने घेतले | उचलून त्यास |
दिले दोन घास | भाकरीचे ||

~ विनायक होगाडे

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: